„Длабоко верував и постојано потенцирав дека СДСМ низ оваа изборна процедура испишува нови репери, критериуми и вредности во политичкото делување во Македонија. Вчера тоа се потврди на најдобар можен начин“, вели во своето денешно обраќање новиот претседател на СДСМ, Зоран Заев.
„Желбите, надежите, очекувањата на нашите противници и нивните медиумски пропагатори за неуспех, кавги и поделби во партијата за наша среќа, а на нивна огромна фрустрација, се покажаа како тотална заблуда и целосно промашена проценка. Од овој конгрес СДСМ излегува гордо и достоинствено. Обединет, моќен, триумфален. Овој наш славенички момент што сите го заслуживме е вовед во серијата успеси што следуваат“, рече Заев.
„Свесен сум дека веќе од денес не чека многу работа. Сурова и исцрпувачка битка со режимот на ВМРО-ДПМНЕ. Јас ѝ го ветив враќањето на победничкиот менталитет на мојата партија. Дојде ред ветувањето да го исполнам. Од денес започнува поразот на ВМРО-ДПМНЕ и демаскирање на политиките на Груевски. Многу брзо ќе се радуваме на успесите“, изјави претседателот на СДСМ.