-Одржувањето на пописот на пролет 2021 година е фиксна работа, – порача денеска премиерот Зоран Заев во неговото гостување во емисијата Утрински брифинг и апелираше Собранието да го донесе потребниот закон кој е влезен во процедура.
Планот е пописот конечно да биде статистичка, а не политичка операција. Токму затоа Владата ја остава целата организација и спроведување на пописот на стручните тимови од Заводот за статистика, а не како во 2011 година, кога ВМРО ДПМНЕ сакаше да го спроведе со Пописна комисија составена од партиски кадри, што впрочем се покажа како погубна комбинација.
-Пописот треба да се одржи во април 2021 и бегање нема. Апелирам до Собранието брзо да го донесе Законот, заради тоа што е заглавен во Собранието и треба, според мене, да го донесат до крајот на годината за навреме да бидеме подготвени- повика Заев додавајќи дека веќе е направена проба на пописот во оваа година, со цел да се направи попис во 2021 година.
Заводот за статистика е во фаза на подготовки за масовната статистичка операција, но многу од дилемите ќе им ги реши новиот закон, со што се наметнува потребата од негово итно донесување.