Едноставен и скромен, како и пред 20 години, таков беше и денеска градоначалникот на Струмица и претседател на СДСМ, Зоран Заев, на класниот час во гимназијата „Јане Сандански“ на одбележувањето на 20 годишнината од матурирањето.
Уште во училишниот двор ја покажа својата непосредност и дружељубивост поздравувајќи се со своите соученици од каде заминаа во училницата во која поминале четири години заедно. Таму ги пречека класната раководителка Билјана Витанова, насмеана и горда на своите ученици.
Триесетина минути евоцираа спомени од средношколските денови, се сеќаваа кој од кого
препишувал, а потврдија дека најмногу препишувале од Зоки.
-Беше голем другар, амбициозен, секогаш гледаше да им помогне на другарите, секогаш дозволуваше да препишувавме од него, вели негова соученичка со која ја делеле училишната клупа.
И класната раководителка Билјана Витанова со задоволство раскажуваше каков ученик бил Зоран Заев.
-За Зоран Заев можам да кажам се најубаво. Беше пример од дете. Јас му бев класна уште од прва па се до четврта година и не само јас,туку и сите професори ќе кажат дека уште од прва година воодушевуваше со неговата харизма, со неговиот квалитет, со неговата амбициозност.
Сите предмети ги учеше подеднакво и секогаш беше одличен, но посебно му лежеа природните предмети, по математика беше посебно активен и често пати го носев на натпревари и по физика исто така учествуваше на натпревари.
Во четврта година на матурата имаше завршен испит од мојот предмет, математика. Одлучен ученик, пример од дете, во секој случај за пофалба. Сега се гордеам со таква личност, се гордеам што Зоран Заев ми бил ученик. Засекогаш ќе биде пример на генерациите и гордост не само моја, туку и на цела Струмица, рече Витанова.
По класниот час, дружењето на генерацијата 1989 – 1993 година во струмичката гимназија продолжи со кафе во едно од кафулињата, а ќе заврши вечерва во еден од познатите струмички ресторани.
