Воспоставивме нов стандард на политичката сцена, како што личи за државотворна партија, изјави старо-новиот лидер на СДСМ Зоран Заев, кој по денешните внатрепартиски избори им се заблагодари на членовите за масовниот одзив и за поддршката да ја води партијата во трет мандат.
-Државотворни партии имаат одговорност да ја унапредуваат демократија во своите редови и во татковината. Ми укажавте чест да бидам по трет пат прв меѓу еднаквите. Чувствувам одговорност да ја оправдам довербата и ќе сторам се достојно да го предводам СДСМ, да биде локомотивата што ќе го движи општеството напред. Денес испишавме историја – рече Заев.
Тој јавно се обврза дека ќе спроведе нова политика, најавувајќи, како што рече, пролетна офанзива за нов пресврт во политичкото делување на СДСМ.
-Најавувам реформа на кадровската понуда на СДСМ, ќе внесеме нова енергија, ќе ги отвориме вратите за сите блиски до социјалдемократските идеи. Ќе ја продлабочиме борбата против криминалот и корупцијата – рече Заев.
Заев: СДСМ ќе има најмногу тројца потпретседатели, но рано е да се каже кои ќе бидат
Многу е рано да се каже кој ќе биде во раководството на СДСМ, допрва почнуваат постапките за предлагање на кандидати од месните и општинските одбори, рече старо-новиот партиски лидер Зоран Заев откако доби трет мандат на денешните први директни внатрепартиски избори.
-Ова е внатрепартиска постапка и подобрување. Кадровските промени се од аспект на воспоставување на највисоките органи. Членовите на СДСМ преку 700 делегати на Конгрес го бираат Централниот одбор, од каде 20 членови се бираат за членови на Извршен одбор, а од страна на ИО се избира генерален секретар, секретари за организација и за меѓународна соработка, како и потпретседатели. Нема да имаме повеќе од тројца потпретседатели, но рано е да се каже кој ќе ги земе овие места – рече Заев.
Тој додаде дека кадровските промени што ги најавува во СДСМ не се поврзани со Владата, од чиј перформанс, како што истакна Заев, е задоволен.