Западните сили денеска го зголемија притисокот врз Русија за да разговара со новата влада во Киев, со цел да се смират тензиите во однос на воената интевенција на Русија во Крим.
Овој дипломатски потег доаѓа во пресрет на состанокот на светските сили во Париз, каде што ќе разговараат за Либан. Сепак, веројатно прва на агендата ќе биде ситуацијата со Украина.
Руските сили и понатаму го контролираат кримскиот регион, Полуостровот на кој Русија поседува голема морнарица.
Земјата на Владимир Путин неколку пати беше предупредена со санкции, а лидерите на ЕУ на својата агенда на состанокот во четврток повторно ќе разговараат за можни санкции доколку не се постигне прогрес во однос на ситуацијата со Украина.
Американскиот државен секретар Џон Кери и рускиот министер за надворешни работи Сергеј Лавров денеска исто така ќе разговараат по ова прашање.
Од друга страна, секретарот за надворешни работи на Британија, Вилијам Хаг потенцираше дека она што ќе биде одлучено на состанокот на ЕУ „делумно ќе зависи од руската подготвеност да разговара со Украина“.
– Доколку не се постигне прогрес да се смири ситуацијата, ќе следат трошоци и последици, изјави Хаг.
Според него, денешниот ден ќе биде тест околу тоа дали Русија е подготвена да разговара со Украина, а порача дека токму тоа го посакуваат светските лидери.