Со отворањето на меѓународната дигитална изложба на тема „Град“, денес во Битола започна четиридневното издание на Интернационалниот младински арт фестивал „Битола Отворен Град 2014“.
На изложбата беа презентирани најдобрите дела во рамките на Интернационалната Инстаграм галерија. Станува збор за 100 фотографии од 50 „отворени“ градови од светот, меѓу кои покрај Битола, се најдоа и фотографии од Њујорк, Лондон, Дубаи, Берлин, Истанбул и други.
Од денеска па до сабота, на различни локации во градот под Пелистер, ќе се одржат повеќе концерти на музички групи од земјата и странство, отворени улични журки, изложби, перформанси, како и големиот традиционален музички хепенинг под отворено небо на Широк сокак.
Главни ѕвезди на првиот фестивалски ден ќе бидат членовите на балканската рок атракција „Negative“, додека како нивни предгрупи ќе настапат српскиот ска-реге-џез-панк бенд ZAA и реге-хард кор бендот Conquering Lion од Тетово.
.jpg)
„Заради атрактивноста на главните ѕвезди, како и заради традицијата главниот музички хепенинг да биде посетен од повеќе од 4.000 посетители од земјата и странство, годинава се очекува овој број да биде уште поголем, со што уште еднаш ќе се потврди статусот на главниот настан , како најмасовен музички настан ова лето во Битола“, вели директорот на Младинскиот културен центар од Битола, Сашо Додовски.
Интернационалниот младински арт фестивал „Битола Отворен Град 2014“ се одржува во рамките на „Битфест 2014“. Покрај главниот организатор, битолскиот Младински културен центар, фестивалот е поддржан од ONE, како и од градоначалникот на Битола Владимир Талески.