Компанијата Самсунг привремено ја запре продажбата и производството на мобилниот телефон Галакси Ноут 7, по консултациите со компаниите за безбедност во Јужна Кореа, САД и Кина, откако беа пријавени повеќе инциденти со експлодирање на телефоните.
Воедно компанијата побара од сопствениците на оваа серија телефони, оригиналната верзија и заменетите производи, да ги исклучат и да ги вратат во продажните места.
– Во моментов правиме промени во распоредот за производството за да ги преземеме сите потребни чекори со цел да обезбедиме квалитетни и безбедни производи, изјави портпаролот на компанијата.
Галакси Ноут 7 на пазарот се појави на 19-ти август, но по помалку од половина месец беа пријавени првите случаи на експлодирање на телефоните.
Самсунг веќе изгуби 25 милијарди долари од пазарната вредност поради проблемите со оваа серија смартфони, но вкупните акции на компанијата се највисоки во историјата.