Вкупно 11 ученици од училиштето “Арсение Јовков“ се наоѓаат на Клиниката за токсикологија. На нив им е земена крв за лабораториски и токсиколошки анализи кои во наредните денови ќе покажат што ги предизвикало симптомите на печење во грлото и очите.
Сите деца се во стабилна состојба, некои од нив во текот на ноќта ќе бидат пуштени дома, а три од учениците кои реагирале подраматично ќе бидат задржани на понатамошна опсервација, потврдија за НОВА на Клиниката за токсикологија.
„Учениците се прегледани, згрижени, сите се во стабилна состојба, но три од нив кои реагираа драматично задолжително ќе бидат задржани на опсервација. Сите покажуваат различни симптоми. Некои се жалат на печење во очите, други во грлото и кашлање, некои на главоболки. Во наредните денови токсиколошките анализи кои ќе се прават на Институтот за судска медицина ќе покажат за што станува збор“велат дежурните служби на Клиниката.
Според лекарите на некои од нив им е даден кислород, а други примаат соодветна терапија.
Според првичните информации, од изјавите кои ги дале децата, се дознава дека кога влегувале во училниците почувствувале силен мирис како на парфем што предизвикало мачнина и печење на очите и грлото. По ова почнале да трчаат и да бегаат надвор.
Информацијата за НОВА ја потврдија од МВР. Од таму потенцираа дека нивни екипи се наоѓаат на терен, местото се обезбедува и се врши увид за утврдување на причините за настаната ситуација.