На МИТ Универзитетот од утрово е мирно. Студентите иако исплашени посетуваат настава нормално. Инспекторите од МВР, УЈП и образование заедно со униформирани наоружани полицајци кои по налог на Јавното обвинителство ги чешлаа документите, ноќеска на полноќ го напуштиле објектот во центарот на градот, информираат за НОВА од МИТ Универзитетот. Освен во трите објекти на МИТ, акцијата од рано утрината се одвивала и во домот на сопственичката Биљана Апостолова, како и во домот на нејзините родители во Македонски Брод.
Како што објави НОВА, Апостолова тврди дека нема основ за што да ја товарат и дека актерите на акцијата се веќе познати, а меѓу нив е и заменик министерот за внатрешни работи, кој до неодамна бил вработен на МИТ Универзитетот, од 2011 година до 2016-та година.
„Ако Оливер Андонов, кој ни ја испрати првата инспекција на МИТ универзитет, смета дека МИТ работел неправилно и противзаконски, тој заедно со нас е исто виновник за незаконското и неправилното работење. Пет години да работиш на МИТ Универзитет тогаш си соучесник во сите злодела кои сега сакаш да ги наметнеш на нас. За сите сегашни и идни дејствија кои тој ги спрема, сакам да му порачам дека ниту се плашам ниту ќе се плашам. Работиме според законот и бараме акредитации за факултети за кои одамна требаше да ги добиеме“, изјави за НОВА Апостолова.
Основното јавно обвинителство се уште се немаат изјаснето зошто се вршел претрес и за какви сомневања се работи.
„По налог на ОЈО, а по наредба на судија од претходна постапка е извршен претрес за да се прибават документи и други предмети што би се користеле како докази во кривична постапка, велат за НОВА од Обвинителството.
МИТ универзитетот долго време не можеше да добие акредитација за одредени факултети. Сопственичката Апостолова, која често во јавноста упатуваше критики кон власта, во интервју за НОВА изјави дека се сомнева дека се работи за опструкции од власта против универзитетот.