Атина: Земјотрес со јачина од 4,8 степени според Рихтер беше регистриран кусо по три часот утрово во Коринтскиот Залив, а грчките сеизмолози ја следат ситуацијата, коментирајќи дека конкретната област е склона на земјотреси.
Според податоците од Геодинамичкиот институт на Националната опсерваторија во Атина, епицентарот на земјотресот е во морскиот дел на 13 километри југоисточно од градот Галаксиди.
Претседателот на Организацијата за антисеизмичко планирање и заштита Ефтимиос Лекас за државната телевизија ЕРТ рече дека засега не постои некаков проблем, но и дека чекаат да го видат развојот на феноменот.
Дополнително, посочи дека „Коринтскиот Залив е чувствителна зона која се карактеризира со висока сеизмичност“.
Сеизмологот Герасимос Пападопулос преку социјалните мрежи коментираше дека земјотресот е „типичен за Коринтскиот Залив“, но и дека отсуството на последователни потреси е загрижувачко и тој лично е воздржан.