Јелена Остапенко е првата Летонка што ќе игра финале на гренслем турнир. Девојката од Рига го оствари најголемиот успех во кариерата и со триумфот над Тимеа Бачински од Швајцарија (7:6, 3:6, 6:3) во полуфиналето дојде како најубавиот подарок за нејзиниот 20 роденден.
„Сакам да играм овде, ве сакам луѓе, неверојатни сте. Отсекогаш играм агресивно и удирам силно по топчето кога имам шанса. Веројатно таквиот стил ми помогна да победам денеска. Пресреќна сум со начинот на прослава на мојот роденден“, рече Остапенко која со 50. винер го завери првиот гренслем финале.
Нејзина противничка за вечна слава во Градот на светлината ќе биде Симона Халеп. Романката во второто во второто полуфинале, исто така во три сета, ја елиминира Каролина Плишкова од Чешка (6:4, 3:6, 6:3). Нејзиниот пробив до второ финале во Париз траеше точно два часа по што и таа ќе има прилика во сабота попладне да игра за својот премиерен гренслем трофеј во кариерата.
Индиецот Рохан Бопана и Канаѓанката Габриела Дабровски се победници на Ролан Гарос во конкуренција на мешани двојки. Тие во финалето беа подобри од Роберт Фарах (Колумбија) и Ана-Лена Гронефелд (Германија) со 2:6, 6:2, 12:10.
Ролан Гарос
Жени, полуфинале
Остапенко (Летонија) – Бачински (30., Швајцарија) 7:6, 3:6, 6:3
Халеп (3., Романија) – Ка. Плишкова (2., Чешка) 6:4, 3:6, 6:3
Мешани двојки, финале
Бопана (Индија)/Дабровски (Канада) – Фарах (Колумбија)/Гронефелд (Германија) 2:6, 6:2, 12:10