Поддржувачите и членовите на Сојузот за иднината рано утринава, започнувајќи во 8 часот протестираа пред општина Центар.
Андреј Жерновски, кандидатот за градоначалник на Општина Центар од Сојузот на иднината, на денешната протестна блокада, рече дека градоначалникот Тодоровиќ нема што да бара на избори.
– Денеска не случајно сме пред општината Центар, општина која е симбол на едно непродуктивно, неразумно трошење на парите на граѓаните. Општина која што стана всушност симбол, претставување на најголемата пералница на пари во Република Македонија, а тоа е проектот „Скопје 2014“. Ние сме против ова расипничко трошење на народните пари и како што знаете тоа беше едно од главните причини за нашето спротивставување на 24ти декември кога опозицијата сакаше да го стопира ова неразумно трошење, изјави Жерновски.
Тој истакна дека уште на изборите во 2011 година, било јасно дека гласовите на здружената опозиција се доволни за победа во Општина Центар.