Автор: Jaсмина Јакимовска
Додека граѓаните молчат, полициската бруталност ескалира, обвинуваат граѓанските здруженија и младите Роми кои реагираат на последните случувања во Топаана кога во полициска акција за приведување избеган затвореник, беа повредувани невини луѓе.
Во видеото снимено од безбедносните камери во дуќан во Топаана за време на полициската акција пред две вечери се гледа како полицаец брутално расчистува се пред себе додека приведува осомничен. Жителите на Тоапаана се исплашени, велат вакво нешто не смее да се дозволи.
Реагираа и дел од политичарите. Бараат внатрешна контрола во полиција.
Во полицискиот извештај пак работата е чиста, полицајците барале затвореник, па откако биле нападнати од мештаните, привеле петмина од нив. Приведените денеска се пуштени од полиција, надлежните најавија расчистување на случајот. Но граѓанските здруженија се сомневаат во ваквите искази. Велат ова мора да престане.
Младите Роми уште еднаш потсетија на случаите со Трајан Бекиров, Мартин Нешковски, филмската акција како што велат на пазарот во Шутка каде постапките на припадници од полицијата завршија трагично. Тие посочуваат дека не го осудуваат приведувањето на затвореникот, но полицијата не смее притоа брутално да се изживува врз оние жители кои случајно се нашле во близина.
Вчера жителите на Топаана со протест го искажаа своето незадоволство против односот на полицијата. Денеска граѓанските здруженија најавуваат мобилизирање на своите активисти против полициската бруталност. Велат, овој случај мора да се испита, ако молчат македонските институци, тогаш ќе се чуе нивниот глас на судот во Стразбур.