Двете малолетни деца за кои родителите обвинија дека биле тепани и малтретирани од Алфите за да признаат дека украле женска чанта, не сториле никакво кривично и не го направиле грабежот. Ова го покажало денешното соочување со оштетената која изјавила дека не ги познава децата и дека тие не се сторители на грабежот.
По, ова семејството ќе поднесе тужба против полициските Алфи, а во случајот ќе им помага Хелсиншкиот комитет.
Вчера, родителите пред камерата на НОВА изјавија дека двете деца, едното на возраст од 12, а другото на 17 години биле застанати пред црквата Св. Спас кај Кале, од неколку припадници на алфите кои почнале да ги удираат со клоци, тупаници и шамари, при што им вршеле притисок да признаат дека ја украле женска чанта.
-Син ми е тепан и од страв морал да признае дека тој ја земал чантата. Поради ударите го однесовме на лекар, имаме снимки, анализи кои ќе послужат како доказ, изјави вчера за НОВА Заими Мишкоски татко на едно од децата.
Децата од ромска националност кои живеат во бараките во близина на црквата, во понеделникот вечерта биле пресретнати од алфите при што, според сведоштво на родителите била употребена сила и децата завршиле во болница.
– Го пратив син ми да купи нешто за јадење, ние живееме блиску во бараките, но по пат него и братучедот ги пресретнале Алфите и почнале да ги тепаат. Кога ми јавија веднаш истрчавме сите. Децата беа тепани и малтретирани пред наши очи за нешто што не го сториле, околу 30 луѓе сме сведоци на бруталноста на Алфите, изјави пред камерата на НОВА Рамиз Усеинов татко на Арамандо, едно од децата.
Семејствата во шок, случајот го пријавиле во Хелсиншкиот комитет и во невладината организација „Амбрела“ , а потоа и во полицијата.
Во СВР Скопје изјавија дека доколку семејствата сметаат дека има пречекорување на службената положба да пријават во Внатрешна контрола на МВР.
Во Хелсиншкиот комитет велат дека ова не е прв случај алфите да ја злоупотребат својата службена положба и да употребат прекумерна сила. Пред месец и половина во Хелсиншки е регистриран уште ден случај на брутално претепување од страна на Алфите, и тоа на истото место кај црквата Св. Спас. Случајот е пријавен и во Внатрешна контрола на МВР, но надлежните се уште не се изјасниле, ниту покренале било каква постапка против припадниците на безбедносните сили, Алфи.