Бидете смирени и почитувајте не, зборувајте aлбански“ пишува на англиски јазик на билбордите кои ги постави Општина Струга на двете страни од Мостот на поезијата, во очи отворањето на 53-то издание на СВП, кои започнаа синоќа.
Пораката е наменета за организаторите и гостите на Струшките вечери на поезијата, а потпишана е од градоначалникот на Струга Зијадин Села, кој во моментов e надвор од државата, како што јавува Телма.
Тој втора година по ред ќе ја бојкотира манифестацијата, бидејќи нема симултан превод од читањето поезија од светските поети и на Албански јазик.
Освен пораката, на билбордите изнесени се и статистички податоци за етничката структура на Струга според последниот потпис од 2002 година и се потенцира бројот на Aлбанци кои живеат во оваа општина.
Од манифестацијата не сакаа да го коментираат овој потег на струшкиот градоначалник.
Прес-конференцијата целосно беше посветена на лауреатот на СВП, јужнокорејскиот поет Ко Ун. Тој се осврна на поезијата како универзална вредност, која силно ја почувствувал во Македонија.
„Чув дека речиси сите Македонци се поети, затоа велам дека Македонија е земја на поезијата. Македонија се уште е жива иако поминала низ бројни страдања уште од античниот период, преку средновековниот период до модерната историја. Од тоа искуство на страдание се родила поезијата, процедурата на животот всушност е процедура на македонската поезија“, рече Ко Ун.
Поезијата на Ко Ун кој зад себе има 150 издадени книги, преведена е на македонски јазик, со што според организаторот на манифестацијата, изграден е мост кон уште една светска литература.