Филмот „Рома“ на мексиканскиот режисер Алфонсо Куарон е добитник на престижната награда „Златен лав“ на 75. Меѓународен филмски фестивал во Венеција, Мостра. Драмата е базирана на детството на режисерот Куарон и во неа се зборува за тешкиот живот во Мексико во 70-тите години.
Со жирито на Мостра, претседаваше мексиканскиот режисер Гилермо дел Торо, кој минатата година го освои Златниот лав за филмот “Обликот на водата”.
Членовите на жирито беа Силвија Чанг, Трине Дурлом, Никол Гарсија, Паоло Џеновезе, Малгоржата Шумовска, Таика Ваитити, Кристоф Валц и Наоми Вотс.
За Златниот лав оваа година се натпреваруваа вкупно 21 филм, а добитникот Куарон стана светски познат со филмот “Гравитација”, кој во 2013 година освои седум престижни оскари на Американската академија за филмски науки и уметности.
Гран при од жирито доби историската црна комедија „Фаворит“ на грчкиот режисер Јоргос Лантимос, а наградата за најдобар за актер му беше доделена на Вилем Дефо, кој го глумеше уметникот Винсент Ван Гог во филмот „Пред портата на вечноста“. Наградата за најдобар режисер отиде во рацете на французинот Жак Одијар за филмот „Сестрински браќа“. Единствената жена режисер во официјалната програма, Џенигер Кинт ја доби специјалната награда од жирито за филмот „Славеј“.
Фестивалот во Венеција, започна на 29 август со проекцијата на “Првиот човек” од американскиот режисер Дамјан Шазел.