Медицинските сестри не се планирани во буџетите на здравствените институции и за нив не важи покачувањето на платите, реагираат од Унијата на ЗМСТАС предводени од здружението „ЗА НАС“. Згора на се, тие велат дека за нив не нема едукации, признавање на високото образование, специјализациите.
„Вложуваме во подобро јавно здравство. Целта е да обезбедиме подобри здравствени услуги, а како ќе се подобрат здравствените услуги без да се овозможат правата на медицинските сестри“велат од Унијата на ЗМСТАС предводени од здружението „ЗА НАС“.
Тие потенцираат дека Министерството за финансии во буџетот за 2019 предвидува за 10% повисоки плати за лекарите специјалисти, но никаде не се споменати медицинските сестри како клучна алка при подобрувањето на здравствените услуги.
„Срамота е што сестринската фела е повторно ставена на маргините во нашето општество. На сите наши обраќања и достоинствени барања за нашите права институциите се обидуваат да не изманипулираат и само да ги одолговлечат процесите кои треба да ги превземат. Медицинските сестри не се планирани во буџетите на здравствените институции за покачување на платите, за едукации, за признавање на нашето образование, за нашите специјализации. А основната причина за сето ова е непостоењето на закон за нашата професија. Изминатиов период подготвивме и предлози за измените во законот, подготвивме предлог решенија за проблематиките со сестрите концесионери но, од Министерството за здравство немаат слух за нас. До кога намерно ќе не тргаат на страна? Ова ли е начинот на кој ќе го подобруваат здравството?“ – изјави сестра Горданка Бешлиовска, претседател на Унијата на ЗМСТАС.
Од Унијата и здружението „ЗА НАС“ вчера потенцираа дека и по еден месец немаат никаков одговор од Министерството за здравство на барањето да се направат одредени промени за реши статусот на сестрите кои остануваат без работа.
„Иако во јавноста министерството за здравство изјави дека веќе се подготвени промени во законот за здравствена заштита и дека истите треба да влезат во собраниска процедура за 10-тина дена сеуште немаме никаква конкретна информација, а секојдневно бројот на отпуштања се зголемува. Парадоксот е огромен што тие сестри не се конкурентни на конкурсите, а и постапката за конкурирање изискува трошоци од 6000 до 7000 дена за припрема на потребната документација“, велат од Унијата и здружението.
Унијата апелира повторно надлежните сериозно да ги сфатат барањата на сестринската фела, кои до сега се обидуваат на достоинствен начин да ги добијат своите права. Доколку институциите немаат слух, следниот пат најавија дека состанокот ќе го одржат пред Министерството за здравство.
Над 40 медицински сестри „концесионери“ во моментов низ цела Македонија се без работа, бидејќи по основ на пензионирање или смрт на докторот, се затвориле приватните здравствени установи основани врз основа на закуп во здравствените домови во кои работеле и тие не можат да се вратат во јавното здравство каде претходно работеле поради завршување на времениот законски рок за нивно враќање. Некои од нив останале без работа и поради ангажирање други лица.
„По затворањето на ординацијата каде работеле и завршувањето на временската законска рамка тие останаа без работа. Прашувам дали во Македонија има друга таква професија на професионалци каде секој ден остануваат луѓето без работа, како што се нашите сестри од концесионерството. Нема ден да не ни се јават од кој било град дека се останати без работа, нагласи Бешлиовска.
Од Министерството за здравство информираат дека измените на Законот за здравствена заштита за преземање во јавно здравство, на медицинските сестри кои претходно работеле во приватни здравствени установи, основани под закуп во здравствените домови, заради затворање на ПЗУ и во меѓувреме останале без работа, се во собраниска процедура.
„Во измените на Законот e внесена oдредба согласно која медицинските сестри, кои ќе останат без работа може да бидат преземeни во јавни здравствени установи.
Овие законски измени, кои сега се уште се во собраниска процедура, пред две недели се усвоени од Владата. Таа ги усвои измените на Законот за здравствена заштита,со можност за преземање здравствени работници со високо образование, стоматолози и фармацевти од приватните во јавните здравствени установи без распишување оглас. На овој начин ќе се пополнат празните работни места на здравствените работници, со пократки процедури“, велат во Министерството за здравство.
Времената мерка од Законот за здравствена заштита од две години истече во септември 2017 година за медицински сестри, односно во февруари годинава за стоматолошки сестри.
Додека овие медицински сестри бараат да се вратат на работа, голем број од нив ја напуштија Македонија и заминаа да работат во европските држави. Повеќето од нив добиле работна виза за Германија.
Во Македонија медицинските сестри стануваат дефицитарен кадар. И покрај тоа медицинските сестри кои останале без работа, велат дека залудно и се пријавуваат на секој конкурс бидејќи не се конкурентни поради нивната возраст.