Здружението на новинари на Македонија денеска изрази загриженост за информациите дека кабинетот на претседателот на државата Ѓорге Иванов на одредени новинари им понудил безбедносни сертификати во име на поголема транспарентност на институцијата. Според ЗНМ, таквиот чекор е обид за притисок и контрола врз медиумите.
Претседателот на ЗНМ Насер Селмани изјави дека најголем дел од новинарите што биле повикани, бланко го потпишале барањето без да имаат можност за правата и обврските на носителите на вакви сертификати. Тој го повика Иванов да им нареди на своите советници да го запрат издавањето на безбедносните сертификати на новинари, а тие што веќе ги добиле да се откажат од нив.
Кабинетот на претседателот на државата Ѓорге Иванов, преку соопштение реагира на обвинувањата на претседателот на ЗНМ, Насер Селмани за издавањето на безбедносни сертификати на новинари дека тој е погрешно информиран. Во процесот на спроведување на итните реформски приоритети, како што наведуваат од Кабинетот, Советот за безбедност планирал активности во кои требало да бидат вклучени и стручни лица-новинари, а за тоа би им биле потребни безбедносни сертификати.
„Во планираните активности очекуваме од новинарите да дадат сугестии за начинот на информирање на јавноста за подигнување на свеста и безбедносната култура за работа со класифицирани информации заради постоење на висок ризик од генерирање лажни вести и планиран истек на информации, што врши ерозија на институциите“, стои во реакцијата од кабинетот на Иванов.
Селмани обвини дека таквиот чекор на кабинетот на Иванов е обид за притисок и контрола врз медиумите.
.