Претседателот на СДСМ, Зоран Заев, доцна вечерва ги посети новинарските екипи кои 14 часа пред портите на Клубот на пратениците го чекаат исходот од работата на комисјата, чиј рок за изготвување на извештајот за случувањата на 24 декември, истекува на полноќ.
Како што информира репотерот на НОВА, Сашка Цветковска, тој не сакал да открие детали за исходот на работата на комисијата, туку со новинарите споделил дека дури сега видел дека македонскиот јазик може да има толку различни нијанси за изразување на исти работи.
Како што НОВА веќе објави главните несогласувања на членовите на комисјата од ВМРО – ДПМНЕ и СДСМ се околу утврдување на повредата на Уставот. При исфрлањето на новинарите и опозицијата од страна на обезбедувањето, како и при запоседнувањето на говорницта на собранискиот спикер.
На средбата во понеделникот меѓу премиерот Груевски и Заев беше договорено дека доколку не биде постигната согласност до петок ќе се смета дека не може да се постигне конечно решение.
„Ова е последен обид за постигнување договор, чие евентуално недонесување ги загрозува европските перспективи на Република Македонија. За договорените активности во наредниот период јавноста ќе биде навремено информирана“, соопштија од Владата во понеделникот.
После средбата Заев – Груевски дел од медиумите објави дека следни активности во наредниот период се можни предвремени парламентарни избори на есен.