Единаестгодишното девојче Ева Крстановска кое боледуваше од лимфобластик леукемија и почина вчера, замина засекогаш без да ја добие шансата да се лекува во странство.
Директорот на Фондот за здравствено осигурување Ден Дончев денеска кажа дека Фондот за здравствено осигурување одобрил да ги покрие трошоците за лекувањето на 11 годишното девојче Ева во странство, два дена откако до Фондот било доставено барањето од родителите на девојчето.
Кога пациентот е во животно загрозувачка состојба, како што беше малата Ева, Фондот има обврска да одговори на барањето за лекување во странство, во најкраток можен рок, односно во рок од 48 часа. Барањето било испратено до Фондот на 25 јуни, а два дена подоцна на 27 јуни лекарската комисија на Фондот за здравство одлучила детето да се испрати на лекување во болницата Gaziosman Pasa во Истанбул, Турција. Лекувањето требало да трае 150 дена, а вкупниот износ за хемотерапијата и за алогена трансплантација на коскена срцевина од несроден дарител бил 145.000 евра, со придружник за време на лекувањето. Со ова Решение било одобрено патување со санитетски авион при заминување на лекувањето за кое трошоците требало да биде предмет на посебна постапка.
Дончев вели дека до нив стигнале понуди за лекување од три болници – две од Турција и една од Италија.
„Цената не беше пресудна во изборот на болницата“, кажа Дончев и додаде дека избраната турска болница не понудила најниска цена.
На барање на родителите на девојчето лекувањето да се изврши во болницата Грисем во Германија, Дончев кажа дека контактирале со болницата и со докторот кој им го посочиле родителите, но од таму не добиле одговор.
„Демантираме дека трошоците за лекување во Германија биле 200 000 евра, зашто одговор од болницата не добивме“, кажа Дончев.
Родителите на девојчето поднеле жалба за одлуката на комисијата од Фондот за лекувањето во Турција, но второстепенета комисија на 12 јули ја одбива нивната жалба .
Изминатиот месец, беа организирани повеќе хуманитарни настани во Струга и во Охрид на кои се донираа пари за девојчето да замине на лекување во Германија, каде семејството сметало дека шансите за успех на лекувањето се поголеми.
Дончев неколкупати на прес конференцијата потенцираше дека состојбата на малечката Ева била итна и животнозагрозувчака, но не сакаше јасно да одговори дали се доцни со процедурите за испраќање на пациентите за лекување во странство. Посебно кога се работи за пациенти заболени од леукемија и кога се знае дека во Македонија не се врши трансплантација на коскена срцевина.
Предлогот за лекување во странство на девојчето Ева, стручниот конзилиум на Клиниката за детски болести, го донело на 21 јуни, кога состојбата на девојчето била влошена.
Министерот за здравство Венко Филипче вели дека стручните конзилиуми на клиниките ги упатуваат пациентите на лекување во странство кога се „исцрпени ресурсите и можностите за лекување во Македонија“.
„На никој не му било скратено правото да се лекува во странство ако бил соодветно упатен. Финансиски средства има секогаш и ќе се обезбедат во секоја ситуација кога пациентите се соодветно упатени од клиниките кои кажале дека кај нив не можат да се лекуваат “ рече Филипче. Филипче вели дека Министерството било насочено кон „јакнење на капацитетот на јавното здравтсво за да се намали бројот на пациенти што се упатуваат во странство.
За дополнителниот фонд за обезбедување средства за лекови за ретки болести кое беше ветување на Владата на Заев, миниситерот Филипче кажа дека било разговарано со раководството на Стопанската комора, и на него се работи. Направени се, рече, анализите, а тимови од правници работат на тоа какво би било тоа тело, под чии ингеренции, кој ќе членува во него, кој ќе го води и со колкава сума на средства.
Малата Ева една година се бореше со многу редок вид на леукемија.