Под притисок на јавноста која бара да знае колкав е имотот на екс премиерот Никола Груевски, Антикорупциската комисија денес свика прес конференција. Но средбата со новинарите не донесе нова информација за имотот на Груевски.
Претседателот на Антикорупциската комисија ги праша новинарите зошто ги интересира имотната состојба на Груевски бидејќи тој повеќе не е функционер.
Но, анкетните листови од почетокот и на крајот на премиерската функција на Груевски не се достапни на сајтот на Антикорупциската комисија и споредба не може да се направи.
Претседателот тврди дека нема голема разлика но не им дозволи на новинарите да добијат фотокопија од документот со имотната состојба на Груевски кој им го покажа на новинарите.
“Најљубезно ве замолувам ова прашање да го затвориме за век и векови амин”, рече тој пред новинарите пред кои се пожали дека телефоните во Антикорупциската комисија не престанале да ѕвонат и сите барале да знаат колкав е имотот на Груевски.
ТВ Телма објави дека последниот анкетен лист на Груевски го нема во јавност и на сајтот на Антикорупциската комисија. Претседателот ја искара Телма затоа што објавувала непроверени податоци но не одговори на прашањата зошто институцијата не одговори на мејловите испратени уште на 28 февруари годинава, ниту на вчерашните телефонски повици до портпаролката на комисијата.
Според комисијата системот е таков што ги брише анкетните листови откако функционерите ќе достават документ дека повеќе не се на таа позиција.