Стотици демонстранти кои во моментов протестират пред штабот на ВМРО-ДПМНЕ се обидоа да го пробијат кордонот од специјалци кој не дозволува пристап кон објектот, јавува репортерката на НОВА ТВ Славица Филиповска.
Граѓаните им довикуваат на специјалците „Еден ден ќе се срамите, штитите криминалци“, „Спуштете штитовите“, „Придружете се, не одете против народот“, но засега ситуацијата е мирна.
Протестот е се уште масовен, а пред еден час на демонстрантите им се приклучија и опозицискиот лидер Зоран Заев со првите луѓе од партијата, како и Стојанче Ангелов од „Достоинство“ и Фијат Цаноски од ПЕИ. Тие не сакаа да дадат изјави за медиумите бидејќи велат дека се појавиле за да дадат поддршка на граѓаните.
Одлуката на претседателот Иванов да ги запре кривичните постапки против сите политичари од власта и опозицијата предизвика граѓански револт и протести на повеќе локации.
Граѓаните прво протестот го почнаа пред Специјалното јавно обвинителство ан кое му дадоа поддршка да продолжи со истрагите, а оттаму демонстрантите се упатија кон Народната канцеларија на Иванов.
Оттаму дел продолжија кон штабот на ВМРО-ДПМНЕ, додека опозицијата кон Влада, за на крај масовно сите да се соберат пред штабот на ВМРО-ДПМНЕ.
Граѓантие бараат повлекување на Иванов од функцијата претседател, бидејќи според нив, со ваквата одлука тој легитимирал злосторничко здружување.
Екипата на НОВА останува на терен.
Граѓани: Ни преостанува само сенароден отпор
Иванов ги прекинува кривичните постапки против власта и опозицијата