Организаторите на Меѓународниот атлетски маратон им се извинија на жените, откако се соочија со жестоки критики од јавноста поради дискриминирачките награди за маратонот.
– Во име на Организациониот Одбор на „Меѓународниот атлетски маратон Охрид“ се извинуваме кон жените и би сакале јавно да кажеме дека ни на крај памет не ни било да вршиме дискриминација према жените. Веќе добиваме некои понуди за помош и во секој случај наградниот фонд ќе биде ист и за мажи и жени и се надеваме дека поттикнавме многу поголем интерес од женската популација кој недостасуваше на оваа трка – пишува во соопштението објавено на нивната Фејсбук страница.
Во повикот за учесници на маратонот беше наведено дека наградите за освоените места на жените ќе бидат помали од наградите за мажите, што наиде на бројни негативни реакции од јавноста, неколку невладини организации и Клубот на пратенички.
Маратонот во континуитет се одржува од 1976 година до 1993 година. Оваа манифестација прераснала од општински, сојузен до меѓународен атлетски мартон а бројот на учесници се зголемувал од 4 до рекордни 107 учесници во 2010 година.
До 1993 година Охридскиот маратон се одржувал во чест на ослободувањето на град Охрид 7-ми Ноември, а од 2004 година се одржува по повод денот на осамостојувањето на Република Македонија 8-ми Септември.