Претседателот Ѓорге Иванов вели дека во тек се консултации со правни експерти за изнаоѓање можно правно решение во врска со одлуката за помилување-ослободување од гонење без спроведување постапка.
– Како што најавив во моето последно обраќање, а во врска со пристигнатите лични барања за повлекување на одлуката за помилување–ослободување од гонење без спроведување на постапка, во тек се консултации со правни експерти со цел изнаоѓање можно правно решение,се вели во писмената изјава на Иванов.
Од досега извршените консултации со врвните правни експерти во државата, Иванов информира дека не е изнајден правен основ за повлекување на одлуката.
– Консултациите продолжуваат во насока на изнаоѓање решение. Ги повикувам и лидерите на политичките партии, потписници на Договорот од Пржино, и тие да се вклучат во овој процес и да понудат правно решение што ќе биде во согласност со Уставот и законите на Република Македонија, вели претседателот Иванов.
Коментирајќи ги граќанските протести кои беа поттикнати од неговата одлука за аболиција, Иванов вели дека никому не му е ускратено правото да искаже незадоволство или протест за која било одлука на која било државна институција.
– Но, во остварувањето на тоа право повикувам да не се нарушува јавниот ред и мир и да не се уништува приватниот и државниот имот, вели Иванов.