Сите бегалци кои беа сместени во транзитниот центар во Табановце полицијата ноќеска, ненадејно и без образложение ги вратила во Грција, дознава НОВА. Станува збор за 49 бегалци од Сирија и Ирак, семејни луѓе, жени, деца, стари луѓе кои во центарот престојуваа речиси една година. Информацијата за НОВА ја потврдија и во транзитниот центар и во невладините организации кои се занимаваат со проблемот со бегалците.
Тие пред половина час влегле во Грција и биле прифатени од грчката полиција. Неофицијално, постапката за враќање на овие бегалци се водела на високо ниво преку МНР, при што била пратена депеша до грчката страна за враќање на бегалците назад во Грција. Кога бил добиен одговор, МВР ги земала и ги транспортирала бегалците во Грција. Нашите извори велат дека причината за враќањето била бидејќи тие биле илегално влезени во Македонија.
Според информациите од центарот, доцна синоќа околу 11 часот дошла полиција и без претходна најава или образложение на бегалците им било кажано да се пакуваат бидејќи ги враќаат назад во Грција. По ова бегалците набрзина биле качени во автобус и однесени кон границата со Грција. Како што дознаваме, дел од овие бегалци сакале да продолжат кон земјите на ЕУ, а половина да останат во Македонија.
Неофицијално, се зборува дека нема повеќе пари за бегалците во Македонија. Во кампот во Гевгелија нивните оброци биле многу оскудни. Таму во моментот престојуваат 69 бегалци.
Од МВР за подоцна најавија детали за случајот. Неофицијално од МВР велат дека станува збор за реадмисија, согласно со договорот што Македонија го потпишала со ЕУ, а не за депортација на бегалците.