Македонците вработени во општина Тетово, ќе го изучуваат албанскиот јазик. Се работи за проект кој го спроведува локалната власт во соработка со британската амбасада и невладината организација АДИ.
Курсот ќе придонесе граѓаните да добиваат подобри услуги од администратицијата и кон нивната работа ќе се гледа со поголема доверба, смета градоначалничката на Тетово Теута Арифи.
– Логиката наша е дека општинската администрација е во постојан дневен контакт со граѓаните а јазикот преставува момент на разбирање и е многу значаен во намалувањето на дистанцата помеѓу граѓаните и општинската администрација. Ние сме спремни и понатаму да инвестираме во подобрување на користење и на македонскиот јазик. Особено ни е значајно да спроведеме курсеви по англиски јазик, земајќи го предвид законот за административни работници, за кои англискиот јазик ќе биде обврска. Интересот за изучување на албанскиот јазик е голем, вели Арифи.
-На првиот час од курсот кој започна денеска, дојдени се сите 65 општински административци од македонска националност. Ова зборува за нивната сериозност кон работата и прифаќање на проeктот, додава Арифи.
Проектот ќе продолжи и во општините Гостивар, Кичево, Врапчиште, Брвеница и Јегуновце. Од невладината организација АДИ, велат дека целта на проектот е да се унапреди меѓуетничкиот дијалог и соработката помеѓу заедниците, како и признавање и почитување на различно етничко, религиозно и културно потекло на етникумите.
– Јас би сакал да ја нагласам потребата од поголем број на заеднички активности, преку кои припадниците од различните заедници, подобро би се запознале и зближиле, да има повеќе заеднички училишни и вон – училишни активности, заеднички посети на културно верски објекти и други активности за изучување на заедниците, вели Катица Михајловиќ од невладината организација АДИ.
Изучувањето на курсот по албански јазик е дел од стратегијата на општина Тетово, за подобрување на меѓукултурното разбирање, усвоена во јуни оваа година.