Денеска во Основниот суд во Куманово почнува судењето против 30-годишниот Бобан Илиќ од Куманово, осомничен за убиството на четиригодишниот Алмир Алиу што се случи на 25 јуни лани.
На судењето ќе му претходи протест организиран од невладинита организација Зани (Глас).
На осомничениот Илиќ му се заканува доживотен затвор затоа што, според обвинението, убиството го сторил со умисла. Како што пишува порталот svedok.org.mk тој се товари за кривично дело „убиство“ од Кривичниот законик по член 123 став 2, во врска со став 3, кој гласи: „Со затворска казна од најмалку 10 години или со доживотен затвор ќе се казни тој што друг ќе лиши од живот и притоа со умисла ќе го доведе во опасност животот на уште некое лице“.
Освен за убиството на малиот Алмир, Илиќ е осомничен и за обид за убиство на родителите на детето. Илиќ се наоѓа во притвор.
Според обвинението, Бобан Илиќ со мерцедес Ц 200, во кој биле и неговиот брат Б.И. (23) и лицето Т.Д., во близина на Здравствениот дом – Куманово, со предниот десен дел од возилото намерно удрил во семејството Алиу. Детето Алмир, со тешки телесни повреди беше префрлено на Детска хирургија во Скопје, но по неколку дена им подлегна на повредите.
По смртта на Алмир, во Куманово беа организирани протести под мотото „За правда“, со цел да се расчисти целиот случај. Родителите побараа да не се креваат тензии и случајот да не се злоупотребува за создавање етничка нетрпеливост. Протестите исто така ги организираше невладината организација „Зани“.
Братот на осомничениот пак, кој бил сведок на настанот, во објава на социјалните мрежи негираше дека станува збор за убиство со умисла, туку за убиство од небрежност, во обид да спаси „жива глава“, бидејќи Илиќ, според неговото тврдење бил бркан од група насилници за да биде натепан.