Уставниот суд денеска донесе времена мерка за запирање на сите изборни дејствија кои произлегуваат од оспорената одлука за распуштање на Парламентот. Со ова Уставниот суд ја отвори можноста, претседателот на Собранието, Трајко Вељаноски да го свика парламентот и да ја поништи одлуката за избори на 5. јуни.
Судот едногласно ја прифати Иницијативата на ДУИ и изрази сомнеж за уставноста на актот со кој се изгласало распуштање на Собранието со одложено дејство. По прифаќање на инцијативата, Судот за седум дена ќе се произнесе со конечна одлука дали одлуката за распуштање е уставна, а дотогаш важи времената мерка за запирање на сите изборни дејства.
Претседателката на Судот Елена Гошева посочи дека ќе гласа „за“ Иницијативата иако според неа ова е преседан во одучувањето на Судот. Сепак според неа во овој случај преовладува јавниот интерес со што прифатливо е да се расправа за веќе распуштено Собрание. Освен неа и сите останати судии гласаа за прифаќање на Иницијативата по што конечната одлука на Судот ќе се знае идната среда.
Утрово влезот на Судот беше обоен во боите на Шарената револуција, што претседателката на судот го оквалификува како притисок врз неговата работа.
