Како иде, го прашува поранешниот премиер Никола Груевски на поранешниот министер за транспорт и врски Миле Јанакиески во еден од телефонските разговори во врска со уривањето на комплексот „Космос“ на бизнисменот Фијат Цаноски, воден на 14 август 2011 година.
„Ми потврдија, утре ќе биде. Овој знае? Ќе дознае, вечер ќе поставуваме сајли, жици. Има шпиони, се’ знае“, му одговара, меѓу другото, Јанакиески на Груевски.
Ова е само дел од еден од разговорите што ги воделе Груевски и Јанакиески а кои беа пуштени на денешното судско рочиште во случајот „ТНТ“ на Специјалното јавно обвинителство (СЈО).
Според она што можеше да се слушне од така наречените „бомби“, планот за уривањето на милионската инвестиција на Цаноски бил направен на втори август 2011 година откако Цаноски, поради затворањето на телевизијата А1, во сопственост на неговиот сват, Велија Рамковски, ја напушта владејачката коалиција а ВМРО-ДПМНЕ го изгуби двотретинското мнозинство во парламентот.
Во еден од разговорите Груевски прашува дали Цаноски може да покрене тужба, на што Јанакиески му одговара „Ќе го јадат Коце и Тони“ мислејќи на тогашните градоначалници на Град Скопје и општина Гази Баба, Коце Трајановски и Тони Јакимовски.
На 15 август истата година откако минирањето завршило во телефонски разговор Јанакиески му објаснува на Груевски дека зградата „лета цела и не знам како се држи“. На тоа Груевски одговара дека ако е така тогаш „не мора цела да ја довршиме“.
„Ако е онеспособена, тогаш не мора да ја довршуваме за да паднат товарот и трошоците за тоа на оштетениот Цаноски“, вели Груевски.
Освен тоа Груевски и Јанакиески договораат како ќе се справат со реакциите на јавноста и на амбасадорите во Македонија а по совет на тогашниот министер за надворешни работи Никола Попоски кој во разговор со Јанакиески вели дека мора да се најде и друг објект што излегува од габаритот кој ќе биде урнат.
„Мора да има барем уште еден, гледав на ТВ. Да собереме такви информации, за кога ќе излеземе, да знаеме. Да не речат на овој му уривате, на тој не“, го советува Попоски тогашниот колега министер Јанакиески.
Според одбраната, разговорите се прибавени на незаконски начин и тие не можат да бидат користени како докази. Судот го одби барањето на адвокатите во случајот „ТНТ“да се читаат редните броеви, кодовите или телефонските броеви, а не имињата и презимињата на учесниците во “бомбите”.
На денешното изведување на доказите беа прочитани и педесетина смс – пораки меѓу двајцата главни обвинети Никола Груевски и Миле Јанакиески.
На одбраната не и беше дозволено и вештачење на аудио фајловите, па според адвокатот Димитар Дангов со ваквиот потег на судскиот совет и СЈО се повредува законот за заштита на приватноста.
Обвинети за уривањето на комплексот „Космос“ се поранешниот премиер Никола Груевски, поранешниот министер за транспорт и врски Миле Јанакиески и поранешниот градоначалник на општина Гази Баба Тони Трајковски.
Според обвинението, обвинетите во 2011 година сториле кривично дело од политичка омраза со уривање на комплексот „Космос” на бизнисменот и поранешен пратеник Фијат Цаноски.
Следното рочиште е закажано за 3 јули 2018 година.