За малезиската авијација, 2014 дефинитивно беше ужасна година, пишува „Њујорк Тајмс“, и доколку нема преживеани помеѓу 162 патници и членови на екипажот од летот 8501 на Ер Азија кој исчезна во неделата наутро, ќе значи дека авионите на Малезија „учествувале“ во трите најтрагични авионски катастрофи оваа година.
Во 2014 година, сè започна со летот 370 на Малезија Ерлајнс. Боингот 777 кој патуваше од Куала Лумпур кон Пекинг, нагло го промени курсот на летот и во раните утрински часови на 8.март за последен пат на радар беше забележан западно од Малајскиот Полуостров над Индискиот Океан.
Според информациите од сателитите, истражувачите веруваат дека авионот со 239 патници и членови на екипажот се срушил некаде во Индискиот Океан западно од Австралија.
Ова е најголемата мистерија во однос на авијацијата, бидејќи до денес нема официјални докази или материјали каде завршил Боингот 777.
Потоа на 17.јули, уште еден авион на Малезија Ерлајнс се урна. Овој пат во Украина, на територија контролирана од бунтовници. Сите 298 патници загинаа. Американските и украинските претставници тврдеа дека авионот е соборен од страна на руските бунтовници во источниот дел на Украина, обвинувања кои беа отфрлени и од Русија и од руските бунтовници.
Ако се споредуваат бројките на загинати од другите авионски несреќи, ниту една не е ни близу до податоците од несреќите на Малезија Ерлајнс.
Авионот Ербас А320-200 кој исчезна во неделата (28.12.2014) е раководен од индонезиската подружницата на ЕрАзија, компанија пак која е базирана во Малезија.
Инаку ЕрАзија никогаш до сега немала фатална авионска несреќа.
Конекцијата на Малезија со трите несреќи е уште поинтересна со оглед на тоа што ниту еден од трите авиони не е помеѓу 25-те најголеми во светот во однос на својот патувачки капацитет.
Сепак Малезија годинава не се справуваше само со тешкотии во воздухот. Исчезнувањето на авионот на ЕрАзија се случуваше во исто време кога земјата се справуваше со монсунски дождови, што беше причината за евакуација на повеќе од 160.000 луѓе. Најмалку 10 луѓе загинаа во поплавите.
Малезијците ги преплавија социјалните медиуми со пораки дека можеби ова е тест од Господ.
„Време е сите да се соединиме, да ја спуштиме топката, да размислиме и да се помолиме“, е едно од најпренесуваните пораки преку Твитер, објавена од жител на Малезија.