22 годишното момче кое почина од Ковид-19 имало Даунов синдром, потврдија за НОВА, од Министерството за здравство. Почина синоќа во 21 часот во ГОБ„8 Септември“, каде пациентот бил лекуван од 16 јули, во тешка здравствена состојба. Лекарите велат дека бил донесен во исклучително тешка состојба и многу брзо ставен на респиратор, така што целото лекување го поминал приклучен апарат за вештачко дишење.
Лекарите сметаат дека неговата состојба, Дауновиот синдром е ризик сам по себе, особено што состојбата со срцето не му била испитувана преходно. Ова го потврдила и неговата сестра, која е медицинска сестра во истата болница. Во Ковид центарот на одделот за интензивна нега каде што бил лекуван, велат дека прво почнало да попушта срцето, бубрезите , па откажале сите органи.
„Не беше кардиолошки испитан, а поради респираторот на кој беше приклучен од првиот момент не можеше да се однесе и да се направи ЕХО на срце. Обично, Дауновиот синдром е пропратен со дефекти на срцето, па затоа и прво почна да откажува срцето.
Бубрезите откажаа, па пак, почнаа да функционираат, но за кратко. Синоќа околу 21 часот почина“, потврдија за НОВА во Ковид центарот на ГОБ“8 Септември“.
Ова 22 годишно момче од Скопје е меѓу шестмината починати кои беа објавени со билансот од последните 24 часа. Неговата смрт предизвика многу реакции и чудење во јавноста.
Покрај 22 годишното момче, починати се уште двајца пациенти од Скопје на возраст од 83 години и 64 години и по еден од Куманово на возраст од 72 години, од Струга на возраст од 48 години и од Охрид на возраст од 75 години.
Денеска се регистрирани 113 новозаболени граѓани со Ковид-19, од направени 1.543 тестови. Ова претставува нешто повеќе од 7, 3 проценти од вкупниот број на тестирани.