Дваесет и шест годишниот Александар.П од село Моноспитово загина, а уште едно лице се здоби со тешки телесни повреди во тешка сообраќајна незгода, што се случи утрово во 05.30 часот, на магистралниот пат Струмица – Ново Село, помеѓу Сачевска крстосница и село Дабиле.
Во сообраќајката учествувале патничко возило Ауди А4 со струмички регистарски ознаки управувано од Александар.П и неговиот 25-годишен сопатник со товарно возило Мерцедес со струмички регистарски ознаки управувано од 57 годишниот Р.И. од село Еднокуќево.
До незгода е дојдено кога возачот со Ауди А4 се движел по магистралниот пат од правец на Струмица кон село Дабиле, а возачот на Мерцедесот се движел од спротивен правец, соопштија од СВР Струмица.
Поради здобиените повреди на лице место починал возачот на возилото Ауди А4 Александар.П. Во незгодата со телесни повреди се здобил неговиот сопатник кој по укажаната лекарска помош во медицинскиот центар во Струмица е задржан на понатамошно лекување и возачот на товарното возило кој по укажаната лекарска помош е пуштен на домашно лекување.
Увид на лице место извршиле Јавен обвинител и полициски службеници. Ова не е првпат на местото познато како сачевска раскрсница, да се случи тешка сообраќајна несреќа со фатални последици.