Вкупно 4,6 милијарди американски долари од 2001 до 2010 година се одлеале преку нелегални трансакции надвор од Македонија, проценува последниот извештај на “Глобал Фајненшл Интергрити”.
Според извештајот кој ги истражува нелегалните одливи на пари од земјите во развој, најголем дел од парите или три милијарди долари се одлеале во 2007, 2008, 2009 и 2010, односно последните четири години опфатени од истражувањето.
Оваа табела го прикажува одливот на пари преку нелегални канали од Македонија во земјите како Маршалски острови, Сејшелски острови, Панама, Кипар, Винсент и Гренадин, Швајцарија и други.
Речиси сите балкански земји се на листата, а Србија е во топ дваесетте земји во светот по трансфер на пари преку нелегални канали. Од оваа соседна земја од 2001 до 2010 се одлеале вкупно 51 милијарда долари. По неа следува Турција со 28, 9 милијарди, Бугарија со 15, 8 и Хрватска со 15, 2 милијарди долари. Најмал одлив има од Албанија или 1, 3 милијарди долари за цела деценија.
Според авторите на ова истражување трендот покажал дека во последните години, односно од 2009 па наваму сумите уште повеќе се зголемуваат.
– Ова има големи последици за економиите во развој. Сиромашните земји изгубиле речиси билион долари што би можеле да се искористат како инвестиции во здравството, образованието и инфраструктурата. Тоа се околу билион долари кои би можеле да се искористат за да се извлечат луѓето надвор од сиромаштијата и да се спасат животи – вели еден од авторите на студијата свестки економски експерти, Сара Фритас.
Целта на истражувањето е да подигне свеста за одливот на астрономски суми валкани пари од државите во развој во оф-шор земјите и да се поттикнат светските лидери да помогнат во санирањето на штетите од перењето пари.
– Астрономски суми валкани пари продолжуваат да се одлеваат од државите во развој во оф-шор во земјите што се даночен рај и во банките во развиените земји. Без разлика на методологијата, јасно е дека од економиите во развој протекуваат с` повеќе и повеќе пари во време кога и богатите и сиромашните нации се борат да го поттикнат економскиот раст. Извештајот треба да претставува повик за будење до светските лидери дека повеќе треба да се направи за да се санираат овие штетни одливи – вели директорот на ГФИ Рејмонд Бејкер.