– 5 до 12 затоа што време е народот да се разбуди и Владата да се вразуми, затоа што 5 до 12 е за да ги спасиме идните генерации – со оваа порака, организаторите на Маршот против сиромаштијата заедно со околу 500 луѓе тргнаа од Собранието до Владата, со поддршка од невладината иницијатива „8 Септември“ и Пактот за борба против сиромаштија.
Маршот беше придружуван од големо присуство на полицајци.
Учесниците во маршот велат го креваат гласот за достоинствен живот и воведување минимален достоинствен приход, како и за нов Закон за социјална заштита. Според податоците што ги презентираа, просечната плата во Грција, Албанија, Србија, Бугарија, БиХ, Хрватска и Словенија е повисока од таа во Македонија, во земјава невработеноста е голема, а сметките за струја, вода и телефон на Македонците се поголеми од минималната плата.
Џелал Хоџиќ од „8-ми Септември“ пред Владата повика на разум, затоа што на сметка на градењето на споменици, панорамско тркало, галии, трпи социјалниот живот на граѓаните.
Помеѓу учесниците беа и неколку стечајци, а нивната лидерка Лилјана Ѓорѓиевска рече дека иако многумина од нив сакале да бидат директно присутни, немаат пари за да пристигнат во Скоопје.