Нема заштитни маски против загадениот воздух за околу 50.000 хронично болни иако пред повеќе од месец и половина, на почетокот на декември министерот за здравство Венко Филипче од говорницата на Владата најави дека најризичните, хронично болни ќе добијат бесплатни заштитни маски, како една од формите за заштита.
НОВА не доби никаков одговор од Министерството за здравство што е со заштитните маски кои ги вети Филипче, дали е распишан тендер за набавка и зошто хронично болните и децата досега не ги добија ветените заштитни маски.
Филипче на прес конференција во Владата тогаш најави дека се прават пресметки колкав е бројот на деца на кои ќе им требаат заштитни маски.
„Извлековме податоци дека имаме 43.000 хронично болни, а бројката на деца за кои се потребни маски се уште се утврдува и бараме начин како да им ги поделиме маските. Со Министерството за животна средина веќе утврдивме дека маските не го решаваат проблемот, но сепак се некаква форма на заштита“, рече министерот Филипче.
Тој тогаш најави дека ќе настојуваат што побргу да се најде решение и да им се поделат маските на хронично болните и на децата.
Три дена подоцна во ек на енормното загадување Филипче излезе со нови мерки против аерозагадувањето. Тој на граѓаните им препорача да не излегуваат од дома и да јадат повеќе овошје и зеленчук.
„Не излегувајте надвор од дома кога е загадено, јадете овошје и зеленчук.Освен препораки Министерството не може друго да направи ништо друго, рече тогаш министерот Филипче.
Во последните денови како што објави НОВА, поради енормното загадување на воздухот болниците се преполни со пациенти, најчесто хронично болни со компликации кои страдаат од астма и хронични белодробни заболувања, како и деца со респираторни заболувања и пнеумонии.
Поради загадувањето беше продолжен зимскиот распуст за учениците за два дена, а од утре се укинуваат и мерките и препораките за алармирање за прагот на загадувањето бидејќи концентрациите на ПМ10 честички паднаа под утврдениот праг на алармирање на 200 микрограми, иако загадувањето на воздухот и денеска е над дозволеното.