Енормното загадување на воздухот ги наполни болниците и предизвика компликации кај хроничните болни, особено тие кои страдаат од астма и хронични белодробни заболувања. Клиниката за Пулмологија и алергологија е преполна и таму веќе нема слободни кревети. Директорот Дејан Докиќ за НОВА потврди дека сите нови случаи се третираат амбулантски, а потешките кои се од Скопје доаѓаат да примаат терапија во дневна болница.
„Зголемен е бројот на пациенти кои се жалат на гушење и влошување на здравствената состојба и тие се најчесто со астма и хронична опструктивна белодробна болест (ХОББ). На Клиниката нема веќе слободни кревети, пациентите кои доаѓаат ги третираме амбулантски, а потешките случаи преку дневна болница“, изјави за НОВА, проф.др. Дејан Докиќ директор на Клиниката за пулмологија и алергологија.
Доктор Докиќ препорачува да не се излегува од дома, ако веќемора да се излезе задолжително да се носат заштитни маски со хепа филтер, а хроничните болни да ја примаат редовно терапијата.
Во Институтот за белодробни заболувања кај децата во Козле дневно има по 100 прегледи. Во моментот таму се хоспитализирани 74 деца. Директорот Ангелчо Андоновски за НОВА потврди дека чести се пневмониите кај деца од други градови. Најмалиот пациент таму има само два месеца.
„Зачестени се пневмониите. Друга патологија се ларингити и опструкции на бронхиите. Во момнетот има слободни кревети бидејќи тие што се подобрени одат во дневна болница. Најмалиот пациент е 2 месечно бебе“, изјави за НОВА Ангелчо Андоновски директор на Институтот за белодробни заболувања кај децата во Козле.
На Клиниката за Детски болести дневно се прегледуваат околу 30 деца во прва и околу 20- тина деца во втора смена. Се работи за помал број на пациенти кои доаѓаат на Клиниката со приоритетни упати од матичните лекари.
„Во однос на патологијата, децата кои се прегледуваат се со респираторни и стомачни вируси кои се пратени со високи температури. За време на викенд, во период од 24 часа има околу 140 прегледи. На одделите на Клиниката се хоспитализирани 130 пациенти( капацитетот на Клиниката е 180) и околу 30 деца се третираат на Дневна болница“, велат на Клиниката за детски болести.
Слична ситуација е и на Институтот за белодробни заболувања и ТБЦ, каде што велат дека бројот е зголемен што соодвествува за овој период од годината.
Итната медицинска помош дневно има од 90 до 100 повици во едно деноноќие и тоа главно преку астматичари, инфаркти, мозочни удари, а преку викенд најчесто повредени од сообраќајни незгоди.
„ Кај нас не е зголемен бројот на повиците од оваа патологија веројатно затоа што луѓето одат директно во амбулантите или болниците или пак, си ја примаат хроничната терапија. Сепак, таму каде што интервенираме се работи за астматичари, инфаркти и мозочни удари’, изјави др. Ѓорѓи Карамановски од Итната медицинска помош.
Поради енормното загадување вчера Владата одлучи да го продолжи зимскиот распуст за учениците за уште два дена, а меѓу мерките кои ги стапија на сила од вчера е бесплатен јавен превоз за граѓаните во Скопје, зголемување на цената на паркинг местата, хроничните болни да не излегуваат од дома, а Град Скопје забрани градежни работи на отворено. Скопје викендов неславно се најде прв на листата по аерозагадување во светот, а енормно количество на ПМ10 честички регистрираа и мерните станици во Битола, Тетово и Струмица.
Владата и Град Скопје ги активираа мерките и препораките кои законски важат и стапуваат во сила кога два дена по ред е надминат прагот на алармирање на суспендирани честички со големина до 10 микрометри т.е. надминување на вредноста од 188 микрограми на кубен метар.
Покрај препораките за користење на јавниот превоз, избегнување престој на отворено, да не се горат штетни материјали и да се чистат оџаците, Град Скопје соопшти и дека во изминатиот месец обезбедил 572 прочистувачи на воздух за секоја училница во 23-те средни училишта под негова надлежност, за што се вложени околу 11 милиони денари.
Граѓаните денеска реагираат на една од мерките на Град Скопје со која за 100 проценти се зголемува цената на паркинг местата, поради загадениот воздух.
Оваа мерка не го одмина ниту Клиничкиот центар, каде на пациентите кои доаѓаат да се лекуваат поради истиот загаден воздух им се наплаќа двојно поголема сума за паркинг.
Приоритет на оваа Влада, пред да дојде на власт беше справување со загадениот воздух. Засега, граѓаните не видоа подобрување на состојбата, а државата постојано е во првите пет најзагадани во светот.