Владата денеска соопшти дека мерките и препораките за алармирање за прагот на загадувањето од утре се укинуваат, бидејќи концентрациите на ПМ10 честички паднаа под утврдениот праг на алармирање на 200 микрограграми, иако загадувањето на воздухот и денеска е над дозволеното.
Последните мерења на мерните станици на Министерството за животна средина и просторно планирање покажуваат концентрации на ПМ 10 честички од 84 во Центар, 97 во Карпош, 131 кај Ректорат, 120 во Миладиновци и 70 во Бутел.
Од вчера освен кај Ректорат каде се регистрирани концентрации над 200 микрограми, секаде се под оваа граница но се сепак над дозволените 50 микрограми.
Среднодневната гранична вредност денеска се движи од 106 микрограми на метар кубен во Центар, 102 во Карпош, 151 кај Ректорат, 98 во Миладиновци, 103 во Бутел, а највисока во Македонија е во Струмица 199 микрограми.
Мерките за заштита од загадувањето беа воведени од страна на Владата во неделата, а се применуваа вчера и денеска. Денеска се очекува да бидат укинати, бидејќи загадувањето е под прагот на алармирање од 200 микрограми.
Меѓу мерките се ослободување од работни обврски бремени жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар, реорганизирање на работното време и лицата кои работат на отворено да работат од 11 до 17 часот, да не се организираат спортски натпревари и други културни манифестации на отворено и да обезбедат услови за зголемени активности на службите за итна медицинска помош, домашна посета и патронажна служба, намалена употреба на службените возила и ограничување на работата на градежни објектi.
Два дена во Скопје согласно препораките на Град Скопје е воведен бесплатен јавен превоз, а загадувањето го одложи и почетокот на второтo полугодие за два дена.