На денешен ден, 11 март, пред 70 години над 7.000 луѓе од Скопје Битола и Штип биле депортирани во концентрациониот логор во Треблинка.
„Покрај тоа што изгубивме 98 отсто од македонските Евреи, настанот претставува најголем процент на депортирани лица било каде во светот. За среќа на светот, но за наша несреќа, ова никогаш не се повтори каде било во Европа. На овој ден – 11 март 1943 година, 7.144 души од три македонски града беа депортирани во Треблинка. Тоа во основа стави крај на петвековниот просперитетен живот на Евреите во регионот“, изјавува за Слободна Европа, заменик претседателот на Управниот одбор на заедницата Рахамин Мизрахи.
Еврејската заедница ги населила просториве во третиот век, но најголемиот број припадници на еврејската заедница дошле на Балканот по протерувањето од Шпанија во 1492 година по тамошната инквизиција.
Еврејската заедница денес е само остаток од тоа што своевремено беше напредна заедница, вели Мизрахи.
По повод сеќавањето на холокаустот на македонските Евреи, Еврејската заедница во земјава организира комеморативен концерт во домот на Армијата.
Освен во Скопје, еврејската заедница организира и комеморативни активности во Штип и Битола. Предвидени се промоција на книга, полагање цвеќе пред споменикот на депортираните Евреи од Штип и пред спомен обележјето на паднатите борци во Битола.