Претседателот на САД Доналд Трамп утре ќе потпише нова верзија на уредбата за забрана за влез во САД, дознава сајтот Политико, повикувајќи се на високи владини извори.
Според овој медиум, Трамп новата уредба ќе ја потише во Министерството за внатрешна безбедност.
Засега не се знае колку значајни измени ќе има во новата уредба, ниту дали Белата куќа ќе го продолжи судскиот спор околу старата уредба.
Според првата уредба што Трамп ја потпиша на 27 јануари, влезот во САД им беше забранет на државјани на седум претежно муслимански земји – Ирак, Иран, Јемен, Либија, Сирија, Сомалија и Судан, на 90 дена, а за бегалците на 120 дена, додека на бегалците од Сирија трајно.
Уредбата предизвика хаос на американските аеродроми, а подоцна судот ја суспендираше.