Поднесена е кривична пријава за управителката на приватната компанија која стопанисува со паркинг просторот во Охрид, поради основи на сомнение за сторено кривично дело узурпација на недвижности.
Според полицијата, управителката со претходна намера зазеле туѓа недвижност која со одлука на Советот на општина Охрид е прогласена за јавен паркинг и е во сопственоет на општината како имот во општа употреба.
– Правното лице и управителката постапиле спротивно на известувањето од градоначалникот на општина Охрид за раскинување на договорот за закуп на паркинг простор и ангажирале вкупно 10 лица како наплаќачи на паркингот, им дале фискални апарати и ги испратиле да наплаќаат на улиците во централното градско подрачје каде бил раскинат договорот. Со тоа тие вчера во периодот од 8.30 до 14.30 се стекнале со противправна имотна корист од 11.450 денари, соопшти полицијата.
Вчера до охридската полиција биле поднесени дваесетина преставки од страна на граѓани на кои им биле блокирани возилата бидејки ги оставиле на паркинг места каде не треба да се наплатува а концесионерот им барал пари.
Компанијата Сузуки има два договори склучени со поранешниот градоначалник Александар Петрески. Едниот за центарот на градот кој завчера го раскина општината, а другиот што се однесува на речиси сите улици низ Охрид ќе се решава по судски пат.