Навивачите на Арсенал сметаат дека Арсен Венгер треба да замине од Арсенал на крајот на сезоната, фудбалерите, пак, сакаат тој да остане. Во нивно име се јави напаѓачот Оливие Жиру кој истакна дека сонародникот на клупата ја има поддршката од колегите и веруваат во заедничка работа и во наредниот период.
„Сакаме Арсен Венгер да го обнови договорот и да продолжи со својата авантура во Арсенал. Се надеваме дека ќе успееме да триумфираме во ФА купот и да обезбедиме место во Лигата на шампиони“, изјави Жиру за „Канал +“.
Паралелно со искажаната поддршка од соблекувалната одат и британските медиуми кои објавија вест дека Венгер сигурно ќе стави параф на понудениот, нов, двегодишен договор. Критиките кон францускиот менаџер се засилија во последниот период. ВБА ги совлада „топчиите“ во саботата со 3:1, а пред натпреварот во Бирмингам навивачки фракции организираа необичен начин за поддршка и барање смена на Венгер.
Два изнајмени авиона го надлетаа стадионот „Хоторнс“. На првиот беше прикачен банер на кој пишуваше „ „Без нов договор. Венгер надвор“ додека десетина минути мина уште еден со порака „Во Арсен веруваме. Почит за АВ“.