Државниот санитарен и здравствен инспекторат по извршениот инспекциски надзор на фирмата добавувач на храна ДПТУУ Бакал Бакеро, каде се подготовувала храната за вработените во фабриката „Леар“ во Тетово, констатирал дека за четири лица од вработените здравствено-хигиенските прегледи биле валидни до 11.02.2017 година, две лица воопшто немале извршени вакви прегледи, а за сите шест лица се направени здравствено-хигиенски прегледи по појавата на сомнение за актното труење со храна.
Резултатите од од микробиолошките анализи од земените брисеви од страна на Епидемиолошката служба од Тетово покажале дека од вработените шест лица кај две лица од нос е изолиран стафилококус ауреус.
Исто така земените брисеви од нежива средина, покажале дека од деветте земени бриса од опрема и работни површини во просториите на кујната во сопственост на Бакал Бакеро, шест се негативни, од два е изолиран стафилококус епидермидис, додека од еден е изолиран стафилококус ауреус.
„Во врска со горе изнесеното, од страна на ДСЗИ ќе бидат поведени прекршочни постапки за непреземени превентивни мерки во објектите и просториите каде се подготвува и служи храна како и за необезбедени здравствено-хигиенски прегледи за лица кои доаѓаат во контакт во производство и промет со храна“, соопшти Државниот санитарен и државен инспекторат.
Во врска со микробилошки неисправната мостра од храна од која, исто така, е изолиран стафилококус ауреус, ќе бидат преземени мерки од страна на надлежна институција -Агенција за храна и ветеринарство.
Објектот кој се користи за поготовка на храна, како и просторот каде се дистрибуира и дели храната и натаму се забранети за употреба се додека не се спроведе темелно механичко чистење, дезинфекција, дезинсекција и дератизација од овластена здравствена установа, добивање негативни резултати од контролни брисеви и обезбедување на вработени со валидни санитарни книшки, по што од страна на ДСЗИ записнички и со симнување на службената лента „Затворено од санитарна и здравствена инспекција“ ќе биде отворен.
Од страна на ЈЗУ Институт за јавно здравје на РМ и надлежниот ЦЈЗ Тетово, по спроведената анализа на резултатите од микробилошките испитувања и спроведеното епидемилошко анкетирање на вработените во Леар Тетово (од втора и трета смена), ќе биде изготвена информација со стручно мислење во врска со актуелната состојба, по што од страна на ДСЗИ до Основно јавно обвинителство Тетово, ќе биде поднесена пријава за покренување кривична постапка.