Неколку стотици активисти за правата на животните денеска на пладне се собраа на плоштадот “Македонија” да изразат револт за непочитување на законите за заштита на животните и за слободната продажба на отрови, известува новинарката на НОВА,Александра Денковска.
“Правда за животните”, ” Убијци”, “Затвор за трујачите” извикуваа активистите движејќи се кон Собранието.
На паролите кои ги носеа со себе имаше фотографии од отруените животни, кучињата убиени во стационарот Вардариште и апели до институциите да почнат да ги извршуваат своите надлежности.
Секој активист со себе го водеше и својот миленик или пак маалските кучиња за кои се грижат.
На протестот највидни беа малечките дечиња кои носеа транспаренти и викаа за правда на животните.
“Сакаме да апелираме до институциите да си ги вршат своите надлежности и да ги фатат и санкционираат трујачите и насилниците. Постојат закони за ова, а институциите не реагираат. Ние бараме животните масовно да се стерилизираат, да има стационари во сите општини, а не вака со логорот Вардариште каде што ги убиваат животните”, порачаа активистите.
Тие додадоа дека немаат точна информација за колку точно кучиња се отруени, но секојдневно на страниците за животни стигнувале фотографии од отруени животни. Како што велат активистите најмногу отруени животни имало во Скопје.
Протестниот марш продолжи кон Собранието, каде активистите истурија сода бикарбона за да се крене свеста за отровите. Од Собранието, протестот продолжи кон градското собрание во парк.