ПИСМО ДО ПРЕТСЕДАТЕЛОТ ИВАНОВ
До:
Г-н Др. Ѓорѓе Иванов,
Претседател на Република Македонија
Вила Водно
ул. Ацо Караманов 33а
1000 Скопје
Скопје, 11.06.2013
Предмет: Молба за непотпишување на Законот за прекин на бременост
Почитуван господине претседател, Ви пишувам како граѓанка на Република Македонија со молба да не го потпишете Законот за прекин на бременост што вчера беше изгласан во Парламентот. Врз основа на мојот долгогодишен ангажман за подобрување на статусот на жената во општеството, вклучително и нејзиното репродуктивно здравје и остварувањето на нејзините репродуктивни права, сметам дека Законот ќе нанесе многу штета не само на директно засегнатите жени, туку и на нивните најблиски, па така и на целото македонско општество.
Жените не се одлучуваат на толку интензивна телесна интервенција поради психичка лабилност или одбивање да се превземе одговорност. Жените одбираат абортус кога немаат друг излез т.е. кога немаат услови за одговорно и квалитетно родителство (без оглед на тоа дали веќе имаат деца или не). Не смее притоа да се заборави дека еден дел од бремените жени забремениле поради тоа што откажала контрацепцијата што ја користеле тие и/или нивниот сексуален партнер. Со други зборови, тие жени и нивните партнери уште пред сексуалниот чин знаеле дека сакаат да ја избегнат бременоста. Во спротивно не би користеле контрацепција.
Ве повикувам да му сугерирате на законодавецот да изготви нов предлог-закон кој нема да ги содржи одредбите за задолжително поднесување специфично писмено барање за прекин на бременоста, задолжително советување и задолжителен период на чекање од три дена. Абортусот треба да остане лесно достапна медицинска постапка бидејќи само на тој начин, т.е. без административни бариери и вршење на психички притисок врз бремената жена, може да се спречи извршувањето на нелегални абортуси во несоодветни услови и од недоволно стручни лица. Како што и самите сигурно знаете, или барем здраворазумски можете да претпоставите, таквите абортуси честопати водат до психички и здравствени проблеми, вклучително и смрт на жените. Тие последици, еднакво како и раѓањето на непосакуваното дете, во никој случај нема да доведат до општество на здрави, одговорни и среќни граѓанки и граѓани што сум сигурна дека е Вашата цел како Претседател.
Ве повикувам исто така да му предложите на предлагачот, Министерството за здравство, да изготви заедно со Министерството за образование и наука програми и кампањи за сексуална едукација, вклучително и користење на квалитетни и современи контрацептивни методи. Еден дел од тие програми и кампањи треба да е задолжителeн во сите образовни установи (од оние за основно до оние за високо образование), а друг дел треба да е наменет за пошироката популација. Во согласност со народната мудрост „Подобро да се спречи отколку да се лечи“, овие едукативни мерки ќе ја намалат потребата од користење на абортусот како средство за контрацепција и дополнително ќе придонесат кон создавање на здраво, одговорно и среќно општество.
Со надеж дека ќе ги прифатите моите предлози, Ви благодарам за одвоеното време и срдечно Ве поздравувам,
Мр. Ана Мишковска Кајевска
(докторантка по политиколошки науки при University of Amsterdam)