Вработените во МекДоналдс рестораните и понатаму ќе добиваат плата, иако не ќе мораат да доаѓаат на работа до разрешувањето на спорот околу раскинувањето на договорот на странската компанија со локалниот франшизер.
Ова денеска го изјави инвеститорот Свето Јаневски пред новинарите на прес конференцијата која се одржа во најстариот ресторан од овој бренд во центарот на Скопје. Јаневски, притоа, изрази надеж дека проблемот ќе се разреши за 3-4 месеци, додавајќи оти смета дека „агонијата“ не може да трае подолго.
Договорот што локалната „СЈ Компани“ го има со МекДоналдс е на 20 години од кои се изминати 15. За причините на раскинувањето повторно не се дозна ништо, а Јаневски рече дека тие биле важни.
Додека траеше прес конференцијата, пред ресторанот се вадеа таблите и написите со логото на МекДоналдс. Како причина за ова беше наведен фактот што ваквиот чекор претставува обврска на локалниот франшизер додека траат преговорите.
Неофицијално, пак, се дознава дека договорот бил раскинат од технички причини, како и дека МекДоналдс засега не покажува интерес за негово обновување. И покрај ова, Јаневски рече дека се разговара договорот да се испочитува и 7-те ресторани, кои работат под логото на МекДоналдс, да продолжат со работа како и досега.