Кина објави дека не поседува „никакви информации” за поранешниот консултант на американските разузнавачки служби Едвард Сноуден, кој ја откри масивната програма за интернет шпионирање на личните контакти на граѓаните.
Според медиумите Сноуден се преселил во Хонгконг.
„Не можам да ви дадам никаква информација”, одговори Хуа Чунјинг, портпаролка на кинеското министерство за надворешни работи, на неколку прашања за евентуалното барање за азил од страна на Ерик Сноуден или точното место на коешто се крие, пренесува AFP.
Портпаролката Хуа го повторила кинескиот став според кој „како и другите земји, и Кина се соочува со сериозни закани од информатички напади”. „Се противиме на секој облик на пиратство и информатички напади”, нагласила Хуа.
Правни експерти веруваат дека американскто Министерство за правда настојува да најде „вистинско решение“ околу Сноуден и неговото „предавство“ како и големата штета што тој им ја нанесе на безбедносните служби и разузнавањето во САД.
Американските власти би можеле да се определат за поднесување кривично обвинение против Сноуден и да побараат од него самиот да се предаде. Тоа според експерти, правно-технички не е екстрадиција, па ваквата солуција може да им помогне на властите во Хонг Конг, бидејќи територијата не е суверена држава, туку е дел од НР Кина.
Едвард Сноуден, чиишто откритија предизвикаа запрепастување во целиот свет, изјави дека ќе се бори против секои барање на американската влада за негова екстрадиција.