Се започна со протестот на жителите на зградите во близина на хотелот Бристол, односно спроти трговскиот центар Рамстор. Соседите се организираа, потпишуваа петиција и побараа да не се сечат дрвјата во паркот пред нивната зграда каде треба да осамне административната зграда во барок и нова катна гаража во близина. Ситуацијата стана аларманта кога почнаа да се поткопуваат и темелите на нивните згради.
Подоцна почна и сечата на дрвјата. Отсечените стебла и мртвите птици кои “паднаа” пред пилите заедно со дрвјата предизвикаа жестоки расправии помеѓу граѓаните и пратеничката Лилјана Поповска од партијата на зелените ДОМ која дојде да види што се случува. Подоцна на помош дојде и новоизбраниот градоначалник на општина Центар кој им вети на граѓаните дека ќе се погрижи зеленилото да остане таму каде што е.
Потоа пристигна и иницијативата доставена од невладината “Плоштад Слобода” кои од новото раководство на општина Центар побараа за измени во Деталниот урбанистички план кои би помогнале да се сочува преостанато зеленило во центарот на Скопје преку спречување на изградбата на новите предвидени проекти. Советот на општина Центар ја прифати инцијативата по бројните расправии помеѓу советницие од опозицијата и советниците на власта. Потоа следи затишје пред бура, за непосредно пред одржувањето на седницата на Советот на која треба да се разгледува и предлогот за предлогот за измена на урбанистичкиот план да се случат протести на плоштадот во организација на граѓанската иницијатива „Веритас“ која излегува со тврдење дека ако се изгласа ДУП-от ќе се сруши црквата Св. Константин и Елена, теза поддржана од некои црковни лица и владејачката партија ВМРО ДПМНЕ.
Градоначалникот Андреј Жерновски излегува јавно и информира дека црквата нема да се руши, односно дека нема да се руши ниту една градба која е започната и за која има уредна дозвола. Но, минатиот петок се случуваат масовни и насилни демонстрации пред бараките од општина Центар при што демонстрантите успеаја насилно да влезат во дворот на општина, се кршеа прозори, се напаѓа и новинари, по што седницата бидува прекината.
Истата седница продолжува и во понеделник. Повторно демонстрации, кршење огради, фрлање со јајца и домати во салата во која се одржува седницата на Советот. Седницата е маратонска и трае 20 часа.
Жерновски не успева да ги разубеди демонстрантите дека црквата нема да се руши, а во истото уверуваат и советниците од ВМРО ДПМНЕ кои тврдат дека доколку се врати стариот урбанистички план, црквата автоматски ќе станела дивоградба.
Но, што навистина ќе се промени и колку тие промени ќе бидат големи?! Општина Центар предлага да врати на сила ДУП-от кој важел пред овој последниот кој сега е на сила и кој сакаат да го менуваат. Иако тој ДУП не ги содржи сите објекти кои се во новиот, советниците од општина Центар објаснуваат дека се што е започнато да се гради со одобрение ќе биде внесено дополнително во деталниот урбанистички план, во спротивно секое рушење би било незаконско.
Со оглед на тоа дека нема да се руши ништо што веќе се гради или е изградено, можностите да се случат драстични промени со донесувањето на овој ДУП се минимални, според советниците во Центар од опозицијата. На пример, најавените шпански скали во центарот на Скопје кои се уште се во фаза на идеја нема да се градат во ситуација кога би се донела оваа одлука на Советот на општина Центар. Нема да се гради ниту административната зграда – висококатница кај Бристол и катната гаража во градскиот парк.
Се на се, малку се работите од Скопје 2014 кои би можеле да се спречат, а она изграденото или во процес на градба останува.