Вечерва Основното јавно обвнителство издаде наредба да се приведат 15 учесници во насилствата врз пратениците и МВР постапува по тоа барање, дознава НОВА неофицијално од извори во МВР и ОЈО.
Осомничените, според истите информации, кога ќе бидат пронајдени, ќе бидат однесени во полициска станица, а потоа и пред судија на претходна постапка.
Врз основа на претходната информација неофицијално од МВР, се бара и мерки за обезбедување, односно притвор.
Претходно МВР испрати писмо до Основното јавно обвинителство со кое бара под итно да се повикаат на сослушување и да им се одредат мерки за обезбедување на четири лица за кои се обезбедени докази дека биле организатори и водачи на насилството врз пратениците кое се случи во четвртокот во Парламентот.
Неофицијално станува збор за Б.Д, Б.И, В.Ј.и И.Д. МВР продолжува интензивно да работи на расчистување на насилството во Собранието и обезбедување на докази.
Јавното обвинителство досега испрати само соопштиение до јавноста дека ги следи настаните, но не се изјасни ниту за организаторите, ниту за евентуална квалификација на делото.
Освен дека имаат „редовна комуникација“ со МВР и дека се поставени 6 обвинители да работат на расветлување на упадот од страна на стотици хулигани во Собранието каде што се тепаа пратеници, Основното јавно обвинителство водено од Марко Зврлевски и по два дена не соопштува никаква инфомрација за тоа што и како се работи на оваа истрага. Според нив, немало услови за да се информира јавноста.
Бројот на лицата лишени од слобода, конкретните дејствија на истражните органи, како и натамошните дејствија кои ќе бидат преземени, јавното обвионителство ќе и ги соопшти на јавноста кога ќе се создадат услови за тоа и откако надлежните јавни обвинители ќе завршат со првично утврдување на фактите.
НОВАТВ од извори во истрагата дознава дека во полиција не бил задржан ниту еден од приведените ноќта по тепањето на пратениците, а добар дел од нив биле ослободувани од комбињата по улици додека патувале кон станицата во Автокоманда по повици од високи функционери на ВМРО-ДПМНЕ како градоначалници, министри и пратеници.