Кандидатката на крајната десница Марин Ле Пен и центристот Емануел Макрон во синоќешната тензична ТВ дебата разменија серијал обвинувања за нивната визија за Франција, а во фокусот беа тероризмот, економијата и еврото.
Анкетите покажаа сигурно водство на Макрон во оваа дебата- се движат и до 63 проценти водство за него.
Ле Пен визијата за Франција ја гледа практично затворање на земјата- во стриктно справување со илегалната миграција, напуштање на еврозоната и референдум за членството на земјата во ЕУ.
Ле Пен постојано го обвинуваше и исмејуваше Макрон, а жестокоста на нападот најмногу се фокусираше на минатото на Макрон, како поранешен банкар и министер за економија.
Таа дури и го обвини дека тој поседува офшор сметка на Бахамите, после што, ден потоа, најави тужба кон непознат сторител, со оглед што одредени медиуми и социјални мрежи ја објавија оваа вест, која Макрон вели дека е лажна. Париското обвинителство започна прелиминарна истрага по тужбата на Макрон.
По дебатата, медиумите особено во Франција не стивнуваат, критикувајќи го начинот на кој Ле Пен се служела со лаги и манипулации за да го оцрни својот противник. Веројатно најголемиот напад Ле Пен го добива по нејзината изјава, поточно исмевање, а се однесува на приватниот живот на Макрон, на неговата сопруга која порано му била професорка, инаку 24 години постара од него:
-Г-дине Макрон, гледам дека се обидувате да играте професор и ученик со мене. Но, што се однесува до мене, тоа не е мој начин, навистина”.
Макрон од своја страна критиките кон Ле Пен ги насочуваше во контекст на нејзините изјави за безбедноста на земјата и чистењето од терористите, неколкупати нарекувајќи ја “најголемата свештеничка на стравот”.