По објавениот напис на НОВА со наслов Вработени во општина Карпош – донатори за кампањата на Јакимовски “ каде што НОВА информира дека донатори на кампањата на градоначалникот Стевче Јакимовси се претежно вработените во општината со која тој раководи, група вработени до редакцијата на НОВА испрати, како што пишуваат тие „остар демант и реакција“ на пишувањата.
-Ние, како граѓани на Република Македонија, сакаме да упатиме остар демант и реакција на Вашите тендензиозни пишувања и алузии околу донирањето за кампањата на кандидатот на СНСМ Стевчо Јакимовски, пишуваат во дописот вработените раководители Петар Теов,Мире Десоски, Никола Николовски, Оливера Груевска и секретарот на општината Владо Поповски.
Вработените понатаму во текстот ни посочуваат дека според законите и уставот тие имаат слобода и право да донираат во било која кампања, а текстот на НОВА го наоѓаат за „тенденциозен и малициозен“. Исто така, не информираат дека им било големо задоволство да дадат пари за кампањата на нивниот шеф.
-Дури повеќе, нам ни претставува лично задоволство што дониравме за таков кандидат во кој цело време верувавме познавајќи ги неговоте менаџерски способности, и што конечно дониравме во победничката опција, што практично се докажа. Секое натамошно врзување на нашите индивидулни права и слободи со било кои други фактори и ситуации, сметаме дека е непрофесионално, некоректно и малку несериозно.
НОВА ја почитува нивната желба да издвојат средства од своите чиновнички плати за кандидатот во кој веруваат, и токму поради тоа направивме исклучок и го објавивме соопштението на вработените, иако согласно законите редакцијата нема обврска да објавува коментари на текстовите, туку само деманти. Со оглед на фактот што вработените не демантираат ништо од напишаното, напротив и го потврдуваат, овој допис не ја обврзува НОВА да го објави, а објавеното е резултат на нашата волја да им посочиме на вработените во општина Карпош дека ваквите коментари и кфалификации би можеле да се сфатат како притисок врз медиумите.
Исто така, НОВА не негира дека секому му е дозволено да донира средства во политичка кампања. Објавувањето на имињата на донаторите, кое впрочем веќе го стори и Државниот ревизор и Државната изборна комисија, има цел да укаже на зачестениот тренд кај дел од политичките партии како донатори во нивните кампањи да се јавуваат претежно лица кои работат во администрацијата.
Во интерес на јавноста, НОВА ќе продолжи да го истражува овој феномен својствен за многу малку демократски држави во светот без разлика за која партија станува збор, а истото го очекуваме и од институциите кои тоа го работат.
Со желба за понатамошна соработка на вработените во општина Карпош им ја пренесуваме дефиницијата на поимот „демант“.
ДЕМАНТ – Изјава со која се негира вистинитоста или се врши исправка на некоја вест или некое тврдење